A asociación Quiroga en Marcha conseguiu reunir o diñeiro necesario para que o artista Iván Floro pinte un mural de grandes dimensión na vila que some a outros xa executados e que teñen como fin crear un museo de arte urbano. A obra localizarase na Rúa Real, no lateral do edificio onde se atopa o supermercado O Roxo.
En total, executar esta iniciativa custa 2.300 euros e ao colectivo faltábanlle 900. Tras un peditorio popular e en soamente unha semana recadaron a cantidade necesaria. A veciñanza do edificio onde se pintará e do lindeiro achegaron 1.400 euros. O Concello encargarase do guindastre para poder realizar a obra e a asociación realizará tarefas de xestión, como correr cos gastos de aloxamento do artista.
"A maior satisfacción será gozar doutro lugar artístico na nosa vila, conseguido nesta ocasión de forma colectiva. Calquera cantidade, por pequena que sexa sempre é benvida", destacaron desde este colectivo que está empeñado en converter a capital do geoparque Montañas do Courel nun referente en arte urbano.
O PROXECTO. Iván Floro é na actualidade un dos maiores talentos novos da pintura, sendo o autor da portada do último disco de C. Boureo.
Polo momento non se desvelou o motivo da obra deste artista, que se sumará ás outras tres promovidas por Quiroga en Marcha. A primeira foi un retrato de Erundina, veciña da vila, que serviu de homenaxe ás "superabuelas". O segundo, situado na Praza Maior, fai referencia ao mel a través dunha alvariza e un oso. Despois chegou unha obra do quirogués José Luís Lemos, coa inscrición "Bícame nesta esquina".
A última incorporación foron os chamados Lapis da cultura, seis esculturas cos nomes doutros tantos escritores vínculados con Quiroga. Os lapis parecen atravesar os edificios da casa da cultura e o albergue municipal, obra executada polo artista salmantino Felipe Piñuela
