Unha muller logrou este xoves saír ilesa do seu vehículo despois de que este comezase a arder na Rúa San Pedro de Monforte. Outra persoa que conducía pola mesma vía a esa hora, aproximadamente ás cinco da tarde, advertiuna do incendio.
Segundo fontes consultadas por este diario, a condutora non se deu conta do intenso fume que saía do motor do coche ata que a avisaron. Por fortuna, conseguiu deter o vehículo, apartalo da calzada e saír ao exterior antes de que as chamas a alcanzasen.
Non houbo que lamentar ningún ferido. Iso si, o coche quedou completamente calcinado e inutilizado.
Os bombeiros do parque comarcal de Monforte trasladáronse ata a zona para apagalo e refrescar a contorna co fin de evitar que o lume se reavivase. Minutos máis tarde procedeuse á retirada do coche queimado.
O suceso produciuse moi preto do instituto Río Cabe e da estación de autobuses, un tramo do centro urbano de Monforte bastante concorrido por vehículos e peóns polas tardes.
