O corpo sen vida de Pilar Díaz Losada, veciña de 66 anos da parroquia monfortina de Vilamarín do lugar de Pacios, foi rescatado este mércores pouco antes do cinco da tarde dun pozo do xurro ao que se precipitou a muller tras sufrir un accidente co seu tractor. A manobra foi complexa e precisouse a intervención dos bombeiros do parque comarcal, un guindastre e os tractores de varios veciños. Tamén prestaron apoio a Policía Local, unha ambulancia do 061 e asistiron axentes da policía xudicial e de seguridade cidadá da Policía Nacional, que teñen aberta unha investigación para aclarar o ocorrido.
Ao parecer, a muller saíu a media mañá do domicilio no que reside co seu marido e unha filla e levou o tractor e un apeiro. A súa intención era dirixirse a un prado próximo para preparar e xuntar a herba que tiñan previsto recoller pola tarde en rulos. Durante toda a mañá os seus familiares pensaron que estaba no prado pero ás dúas e media, cando non regresaba, tentaron sen éxito chamala. Ao non ter resposta foron a buscala, non a atoparon na parcela e foi de regreso á vivenda cando se decataron de que o tractor que conducía envorcara no pozo de xurro que hai próximo á vivenda.
Os familiares da vítima chamaron de inmediato ao 112 que desprazou aos bombeiros de Monforte á zona. Eles solicitaron o apoio dun guindastre e pediron aos veciños que retirasen coas súas cisternas o xurro do pozo para poder acceder ao tractor. En canto o vehículo quedou descuberto o suficiente, un guindastre encargouse de retiralo.
O tractor levaba enganchado un apeiro para xuntar a herba e o corpo da muller apareceu entre as dúas máquinas.
A vítima puido sufrir un mareo ou despistarse
A propia filla da vítima non se explicaba que podía sucederlle á súa nai, quen manexaba ben o tractor e coñecía dabondo a localización do pozo de xurro. A muller cre que a súa progenitoria tivo que despistarse ou sufrido algún mareo. Durante os traballos de rescate do corpo, a familia estivo apoiada polos veciños, o alcalde de Monforte, José Tomé, e o edil José Luis Losada.
O pozo
A fosa na que ocorreu o accidente ten dous metros de profundidade, catro metros de ancho e 20 de longo. Estaba chea e ten unha capacidade aproximada de 160 metros cúbicos.
