Dúas persoas morreron nas últimas 48 horas en Monforte tras dar positivo en covid-19. Segundo informou a Consellería de Sanidade a última hora deste venres, os defuntos son dous homes, de 92 e 93 anos, que se atopaban ingresados no hospital monfortino.
Un dos óbitos produciuse este xoves día 23. O falecido procedía da residencia DomusVi de Monforte, un centro de maiores que rexistrou un importante brote, con 32 infectados o mércores
O outro nonaxenario pereceu este mesmo venres, tamén no hospital monfortino. Os dous, segundo matiza o Sergas, tiñan patoloxías previas.
Con eles son xa 257 as persoas que perderon a vida na provincia de Lugo tras contraer o virus desde o inicio da crise sanitaria, aínda que o Sergas contabiliza unicamente 249 ao non sumar algúns lucenses que perderon a vida noutras áreas sanitarias.
Con estes dous decesos elévanse a 2.628 as vítimas do covid en Galicia desde o inicio da pandemia.
