Os monfortinos mostraron a súa cara máis solidaria coas catorce persoas que integran o circo Nevada, entre elas tres nenos de cinco, nove e quince anos e unha señora que acaba de cumprir os 93. Chegaron o pasado día 10 á cidade para realizar varios pases do seu espectáculo dirixidos ao público infantil pero se desatou a pandemia do coronavirus e non puideron actuar. Iso causou o caos nesta pequena comunidade circense, pois como sinalou o dono desta empresa familiar, Javier Segura, "se non traballamos, non comemos".
O grupo pasa por un momento moi difícil, crítico, pero Javier Segura destacou na tarde deste xoves "a solidariedade deste pobo", polos veciños de Monforte. Ata o coñecido como campo do Baldomero, un amplo solar onde está instalada a carpa e as autocaravanas nas que viven os membros do circo Nevada, achegáronse varias persoas para prestarlles axuda. "Apareceu unha furgoneta para entregarnos varias barras de pan e unhas señoras trouxéronnos ovos e patacas. Tamén dun restaurante de cuxo nomee, síntoo, non me acordo, facilitounos seis grandes pizzas de forma totalmente gratis".
Javier Segura agradece toda esta axuda, como prestada por Cáritas, que lles proporcionou comida non perecedoira, como pasta e arroz, para poder saír adiante mentres dure a corentena e teñan que permanecer en Monforte.
"A verdade é que non se como imos saír desta. Estamos aquí, sen apenas diñeiro e a 600 quilómetros da nosa casa". E é que a maior parte dos integrantes do circo Nevada son da localidade cacereña de Talayuela, de pouco máis de 7.000 habitantes.
"Todos os nosos aforros esfumáronse nas reparacións necesarias, polo que agora estamos a dúas velas"
Javier Segura indicou que sen apoio non poderán regresar ao seu pobo. "Para iso hai que encher de combustible todos os vehículos e por desgraza non dispomos de fondos para iso".
E é que o 2020 está a ser un ‘annus horrobilis' para o circo Nevada, xa que sufriu varios infortunios debido ás inclemencias do tempo desde finais do pasado ano, primeiro en Asturias e logo no norte da provincia de Lugo, en concreto en Ribadeo, onde un vendaval afectou seriamente a carpa.
"Todos os nosos aforros esfumáronse nas reparacións necesarias, polo que agora estamos a dúas velas. Como dicía antes, se non traballamos non comemos e se polo momento estamos a saír deste mal grolo é grazas á solidariedade dos monfortinos.
