O padrón de habitantes de Monforte este xoves situábase en 18.770 persoas, 423 máis que as rexistradas a data 1 de xaneiro deste ano. O rexedor municipal, o socialista José Tomei, indicou que este incremento no número de habitantes censados ao longo deste ano, marcado pola pandemia, está en gran parte motivado polas diferentes liñas de axudas postas en marcha polo equipo de goberno para paliar entre a poboación os efectos da crise, subvencións ás que se podía optar cumprindo, entre outros requisitos, estar empadroado no municipio.
Son o Plan Reactiva Monforte, que repartiu axudas entre 1.211 empresas, autónomos e traballadores por valor de 543.000 euros e o de apoio ás familias e aos sectores económicos, que supuxo axudar a 4.282 familias, repartindo 10.811 bonos por importe de 270.275 euros, que significaron un importante apoio para os sectores económicos de Monforte, destacou Tomei.
A maiores, o alcalde criticou á portavoz popular, Katy Varela, por, no último pleno, dicir que o goberno local non facía nada para frear a sangría poboacional no municipio Tomei manifestou que os datos falan por si sos e que a popular "fala de ouvidas".
MENOS DE 20.000. En o ano 1998 foi cando Monforte baixou dos 20.000 habitantes que mantiña de forma estable desde os anos 40 do século XX, coincidindo co auxe da estación do ferrocarril.
De pouco serviron as campañas realizadas tanto polo goberno daquel entón, do popular Nazario Pin; como logo o liderado polo nacionalista Severino Rodríguez, co fin de recuperar os 20 milleiros de veciños.
