Os nenos de entre cinco e doce anos de Monforte terán a oportunidade de participar nuns campamentos de verán que o Concello, en palabras do alcalde, José Tomé Roca, foron deseñados para ocupar o tempo libre dos pequenos e ao mesmo tempo favorecer a conciliación familiar. Hai un total de 240 prazas que se repartirán en tres quendas de 80. O primeiro será de 13 ao 24 de xullo; o segundo, do 27 de xullo ao 7 de agosto, e o terceiro, do 10 ao 21 de agosto.
O rexedor monfortino destacou o feito de que, por primeira vez, o campamento de verán ten unha maior duración, algo que, destacou, "representa unha gran esforzo desde ou Concello, pero estamos convencidos de que a conciliación familiar nestes tempos de crise, pero tamén que vos cativos poidan gozar de actividades suadables e lúdicas, son cousas que ou Concello debe coidar e promover, algo que faremos baixo estritas medidas de seguridades e hixiene", subliñou.
Tomé Roca explicou que a distribución dos rapaces farase en tres instalacións deportivas permanentes durante o todo o campamento, asignando a cada un dos grupos unha delas. Serán o polideportivo municipal da Pinguela e os pavillóns deportivos do IES A Pinguela e do colexio dos Escolapios.
O Concello pon en marcha por primeira vez este ano unha preinscrición de xeito telemática que se habilitará a través da páxina web do Concello (www.concellodemonforte.com) co obxectivo de que a xente interesada poida, a través do seu móbil ou ordenador, facer a súa preinscrición sen necesidade de acudir fisicamente ás oficinas municipais.
No momento da reserva de praza, as persoas interesadas poderán solicitar a participación algún dos tres quendas. Na asignación de prazas terán prioridade as persoas empadroadas no concello de Monforte, así como aqueles nenos cuxos proxenitores estean ambos traballando e familias monoparentais.
O custo da actividade será de 51,75 euros por quincena para matrículas sen transporte e de 67,28 euros para aqueles nenos que necesiten ir en bus. As familias numerosas terán un 50% de desconto sobre estes prezos que, destacou Tomé, non se incrementaron desde hai anos.
