Monforte investirá 30.000 euros na promoción do consumo local en Nadal

Este Nadal eu merco en Monforte é o nome elixido polo Concello para a campaña feita co fin de promocionar o consumo nos negocios locais. O alcalde, José Tomei, e a tenente de alcalde, Gloria Prada, presentaron este mércores a iniciativa, na que o Concello investirá un total de 30.000 euros.

No marco desta acción organizáronse dous concursos. Un é para conseguir bonos de 25 euros para gastar na hostalería ou o comercio monfortinos e outro, de decoración de escaparates, portais, balcóns e fachadas con elementos típicos do Nadal. Ao primeiro destinaranse 25.000 euros e ao segundo, 5.000.

Tomei explicou que a idea é incentivar a compra nos establecementos da cidade ante o importante número de actividades canceladas debido á pandemia. É o caso do mercado do Nadal, os contacontos, os talleres para nenos e adultos ou o campionato de scalextric.

Co concurso de bonos colaborarán as dúas radios locais. Entre o vindeiro luns, día 7, e o 29 de xaneiro emitirán cada día un programa especial duns 15 ou 20 minutos. Os oíntes poderán chamar a unha das emisoras e terán que contestar de forma correcta a unha pregunta da locutora. A estimación é repartir 15 premios diarios, ata chegar a mil bonos. Só entregarase un por acertante, que non poderá repetir.

Os agraciados terán ata 12 de febreiro para recoller os bonos na casa consistorial. Cada mércores poranse a disposición os da semana anterior. A data límite para gastalos é o 20 de febreiro e os establecementos terán de prazo para solicitar o pago ao Concello ata o 1 de marzo.

DECORACIÓN. Hai tres modalidades distintas no segundo concurso da campaña. Por unha banda están os negocios comerciais, que poderán participar cos escaparates ou o interior dos seus locais. A segunda está dirixida á hostalería e nela valorarase en conxunto a mellor entrada, interior e ventás.

A terceira dedícase ás vivendas. Está aberta a comunidades de veciños dun edificio, balcóns e fiestras de domicilios e fachadas e xardíns de casas unifamiliares. En todos os casos, a decoración terá que verse desde a vía pública e estar exposta entre o 22 deste mes e o 7 de xaneiro.

Ao inscribirse hai que achegar cinco fotos da decoración realizada para ser valorada polo xurado. Nas categorías de comercios, hostalería e vivendas haberá tres gañadores, con respectivos premios de 300, 200 e 100 euros. As casas unifamiliares aspiran a un agasallo de 200, 100 e 50 euros.

Entre os participantes (excepto os gañadores) sortearanse 25 lotos de bonos, cada un cun importe de 100 euros, que deberán consumirse antes do 31 de marzo. O fallo do xurado e o sorteo daranse a coñecer o día 30.