A Policía Nacional identificou ás tres persoas que, supostamente, cometeron desde o pasado día 2 deste mes numerosos roubos en establecementos comerciais e hostaleiros de Monforte. Segundo puido saber este diario, trátase de tres menores de idade, todos veciños da cidade do Cabe. Un é de nacionalidade española, ao que se considera o xefe do grupo; mentres que os outros dous son orixinarios de Romanía e da República Dominicana.
Un deles xa foi detido, o suposto organizador dos feitos delituosos, que se atopaba escapado dun centro de acollida situado na provincia de Ourense, do que fuxiu en varias ocasións. Tras a súa detención regresou ao lugar onde desde hai varios anos está baixo custodia.
O DA CATANA. Trátase dun mozo que agora ten 17 anos e que hai dous foi detido pola Policía Nacional de Monforte despois de ameazar cunha espada tipo catana, cunha folla de 55 centímetros de lonxitude, a dous axentes que tiveron que reducilo, non sen dificultades, xa que opuxera unha forte resistencia.
De feito, os policías sufriran lesións no momento da súa detención, que levou a cabo na casa da súa nai, situada na parroquia de Ribasaltas.
Polo que respecta aos seus colegas, xa identificados, a Policía Nacional intenta dar co seu paradoiro a fin de que pasen a disposición xudicial e dar por pechado este caso. Esta onda de roubos en pleno centro de Monforte causou unha grande alarma entre a veciñanza.
OS ROUBOS. Aos mozos acúsaselles de ser os responsables do roubo en tres establecementos comerciais e nunha cafetería o pasado día 2. Os locais foron saqueados de madrugada tras rebentar as fechaduras das portas de acceso.
Foi determinante para a súa identificación as imaxes gravadas por un sistema de videovixilancia da cafetería do hotel Ponte Romana, onde entraron e en poucos minutos foron capaces de rebentar a máquina comecartos.
En días posteriores, os mozos entraron noutros locais, como nun coñecido restaurante da Rúa Duquesa de Alba ou nun establecemento do barrio da Estación.
