Os trámites para que o aceite que se obtén das oliveiras centenarias do val de Quiroga conte co selo Denominación de Orixe Protexida (DOP) xa están en marcha. Así llo transmitiu o conselleiro de Medio Rural, José González, ao alcalde quirogés, Julio Álvarez, a pasada semana, pero ratificando este luns o inicio do expediente administrativo.
O anuncio do titular do departamento de agricultura da Xunta prodúcese un mes despois de que Julio Álvarez se reunise en Santiago co titular do Goberno galego, Alberto Núñez Feijóo, para mostrarlle a súa preocupación ante a falta de resposta a unha solicitude presentada en marzo.
Álvarez falou con Feijóo durante algo máis de media hora da importancia de dotar o aceite quirogués dun selo de protección de orixe protexida.
Os produtores e o alcalde reclaman desde hai anos dispoñer dun selo de calidade
En Quiroga esperan que os trámites se axilicen a partir deste anuncio de Medio Rural, que debe enviar toda a documentación ao Ministerio de Agricultura e, finalmente, á Unión Europea para que aceite de Quiroga teña o seu particular sinal de calidade. Con iso cumprirase un dos grandes obxectivos dos colleiteiros da comarca.
Polo momento, este produto é unha marca rexistrada polo Concello —cun comité que funciona como un consello regulador— ante a posibilidade de que algunhas empresas se vexan tentadas a vender aceite elaborado noutras partes de España coma se fose de Quiroga.
A administración local chegou a denunciar unha firma que adquiría as olivas en Estremadura e extraía o aceite en Xirona antes de comercializalo coma se todo o proceso se fixese nunha almazara da comarca quiroguesa con olivas autóctonas.
2.000 anos atrás
Ambas as variedades son moi abundantes no val, sendo introducidas, crese, polos romanos hai 2.000 anos, cando sacaban ouro do río Sil.
