O auditorio municipal de Chantada acolleu a presentación da segunda edición do seminario Tralas pegadas do Camiño de Inverno nas paisaxes da Ribeira Sacra, organizada pola fundación Juana de Veiga. Tras analizar o pasado setembro o patrimonio presente de Quiroga a Monforte, nesta ocasión será a quenda para o percorrido que une a cidade do Cabe con Chantada.
O coordinador da actividade, Mario Crecente, foi un dos que presidiu este luns a presentación da actividade. Acompañáronlle o alcalde de Chantada, Manuel Lorenzo Varela
O taller durará ata o venres e no programa están incluídas varias saídas e relatorios destinados a destacar a importancia da ruta de peregrinación a Santiago na paisaxe da Ribeira Sacra. O técnico de cultura do Concello de Tui, Rafael Sánchez Bargiela, abriu a serie de conferencias cunha titulada O Camiño e a importancia dous procesos de participación. Seguiulle Ana Goy Diz, catedrática de Historia da Arte pola Universidade de Santiago de Compostela (USC).
A primeira xornada contou tamén coas intervencións de Rubén Camilo Lois González, que falou de O Camiño como fenómeno social, e do propio Mario Crecente. O coordinador explicou os obxectivos e a metodoloxía do seminario, que ten o fin de propor estratexias de delimitación, intervención e desenvolvemento.
O día pechouse con sendas saídas a Pantón e O Saviñao. Os participantes tiveron visitas guiadas ao ecomuseo de Arxeriz e a adega Abadía da Cova.
A paisaxe, a declaración do Camiño de Inverno como ruta oficial ou a importancia do turismo serán outros dos aspectos a tratar nas diversas charlas. A presidenta de Camiños a Santiago pola Ribeira Sacra, Aida Menéndez; a xerente do consorcio de turismo, Alexandra Seara, ou a propia Isabel Aguirre atópanse entre as persoas encargadas de impartir conferencias esta semana.
Os asistentes prepáranse este martes para realizar un tramo do Camiño de Inverno entre Diomondi e os Cóbados de Belesar, onde terán a posibilidade de asistir a un taller dos sentidos a cargo de Francisco Almuíña e outro de esgrafiados do que se ocupará Carolina Sánchez Sáez. Ademais visitarán as instalacións de Vía Romana.
O mércores e o xoves serán días de traballo en grupos e o venres exporanse as propostas de cada un deles. Entre as 13.00 e as 13.30 horas producirase clausúraa a través de Isaías Calvo da Uz, o director do Plan Xacobeo 2021.