A Consellería de Cultura publicou este mércores a licitación da restauración das pinturas murais da nave principal da igrexa de San Vicente de Pinol, no municipio de Sober, cun orzamento de 137.000 euros.
O delegado territorial da Xunta en Lugo, José Manuel Balseiro, destacou a importancia desta actuación, que "servirá para recuperar un conxunto pictórico de gran valor histórico e artístico, que permanecía na súa maior parte oculto, cuberto pola cal".
Os traballos centraranse nos muros norte e sur da nave, así como no arco que os une a ambos. Hai áreas, manifestou a Xunta, nas que se fixeron "catas polas que asoman os elementos iconográficos, ademais de zonas desencaladas que tamén necesitan dunha restauración". O estilo das iconografías sitúaas como unha obra pictórica de principios do século XVI.
