O monfortino chega ao club do Saviñao coa idea de establecer unha forma de traballar "potente e forte" que axude ao equipo "a saír de onde está"
Juan Torrado é o novo adestrador do Atlético Escairón. Este monfortino de 47 anos foi o elixido pola directiva do club do Saviñao para substituír no cargo a Julio Corral, cesado tras a avultada derrota (0-5) cultivada o pasado domingo en casa contra o San Tirso.
"Gústanme os retos e este o é, quero axudar ao club a saír de onde está", declarou Torrado. O Atlético Escairón é pechacancelas do grupo 1B de Autonómica Preferente, con só tres puntos sumados en once xornadas e sendo o conxunto máis goleado da súa Liga, con 32 tantos encaixados.
O primeiro obxectivo de Torrado será fomentar "a unión, o grupo e o esforzo de cada xogador". O técnico quere establecer unha forma de traballar "potente e forte" para que o Atlético Escairón "poida facer máis no futuro". Sobre o estilo de xogo, o novo míster quere coñecer primeiro aos seus futbolistas. "Para facer o cesto hai que ver as vimbias primeiro", dixo.
Juan Torrado indicou que outro dos motivos para aceptar a proposta do Atlético Escairón é a amizade que mantén co presidente, Jorge Rodríguez, e co director deportivo, chamado tamén Jorge Rodríguez.
Traxectoria. Como xogador, Juan Torrado formouse nas Areas e o Calasancio antes de militar no Quiroga, o Sober e o Mindoniense. Logo recalou en Lemos, en Terceira División, antes de facer as maletas e seguir a súa traxectoria fóra de Galicia. Entre as camisetas que vestiu figuran as do Tenerife B, o Granada 74 ou o Atlético Baleares. Ao seu regreso a Monforte xogou media campaña na Sarriana.
Como adestrador, en varios dos equipos nos que xogou asumiu labores de preparación no fútbol basee. Tamén foi membro do corpo técnico de entidades como o Atlético Baleares ou o Prat.
