Unha das lendas do baloncesto español, Juan Carlos Navarro, deixouse ver pola Ribeira Sacra. En concreto realizou unha visita ao municipio de Sober. Alí, Navarro e a súa esposa, foron recibidos por directivos da pena barcelonista Val de Lemos Luís Conde e José Luis Campos.
Juan Carlos Navarro xogou de escolta no Barcelona, equipo co que logrou 23 títulos, entre os que destacan oito ligas, sete copas, cinco supercopas e dúas euroligas. Como internacional español abanderou unha exitosa xeración coñecida como os Júniores de Ouro, que se proclamou campioa europea xuvenil en 1998 e campioa mundial júnior en 1999 ao derrotar na final a Estados Unidos. Foi internacional absoluto e capitásn da selección española entre 2000 e 2017, totalizando 253 partidos.