José Tomé Roca promete converter Monforte no Vigo do interior

O candidato do PSOE á alcaldía de Monforte, José Tomé Roca, comprometeuse no mitin central da campaña electoral que culminará o vindeiro domingo a converter a cidade "no Vigo do interior. Así, Gonzalo Caballero, pódesllo dicir ao teu tío. Que temble Vigo", destacou Tomé no medio dunha pechada ovación dos asistentes.

Antes, Gonzalo Caballero, secretario xeral do PSdeG-PSOE, encomiou a xestión realizada por Tomé á fronte da alcaldía ao longo dos últimos catro anos. Respecto diso, sinalou que Pedro Sánchez era coñecedor do traballo realizado e que lle pediu que lle transmitise a José Tomé e ao seu equipo todo o seu apoio. E é que Tomé sempre apoiou a Sanchez, quen visitou a cidade no mes de abril de 2017 cando optaba á secretaría xeral do PSOE, algo que non esquece o líder dos socialistas.

Caballero chamou aos presentes a que o triunfo electoral socialista nas eleccións xerais se repita en Monforte nestas municipais. Mostrouse convencido de que así será. "Estamos como motos. Estamos felices", indicou, por conseguir "uns resultados en Galicia históricos", e non dubidou de que as municipais servirán para consolidar o ascenso da formación logrando as alcaldías das principais cidades de Galicia.

CAMBIO. Outro dos intervinientes no mitin foi o secretario provincial do PSOE, Álvaro Santos. Cualificou a José Tomé de traballador "incansable e resolutivo", polo que non dubidou en manifestar que se a cidadanía lle concede outros catro anos á fronte da alcaldía "este concello non o coñecerá nin a nai que o pariu".

Santos tivo palabras de recordo cara aos partidos da oposición municipal, que chamaron a José Tomé 'o rei do asfalto'. O secretario do PSOE de Lugo indicou que el estaría orgullo de tal apelativo e que se Tomé tivo que asfaltar "oitenta rúas e 200 camiños do rural" foi porque "outros non se preocuparon deles e deixáronos estragar".

A súa intervención pechouna con referencias á "desintegración" do PP local e "a unha formación da que se foron case todos", sinalando directamente ao BNG monfortino.

APLAUSOS. O secretario federal de xustiza do PSOE e embaixador de España ante a Unesco, Andrés Perelló Rodríguez, achegouse ata Monforte para apoiar o seu compañeiro nestas municipais. A súa longa intervención foi a máis aplaudida polo público.

Levou a cabo unha pormenorizada crítica ás políticas conservadoras, acusou os partidos de dereitas de cinismo e aproveitou a ocasión para facer un discurso en clara clave feminista.

O momento álxido das repetidas ovacións que levou foi cando aseverou que o PSOE "está moito máis preto de Dívos que o PP".