Desde o interior da pandemia

O centro para persoas con discapacidade física de Bóveda, que xestiona Domus Vi, comezou antes da pandemia de Covid-19 a editar unha revista chamada Falemos. O director das instalacións, Fernando Prada, di que o obxectivo desta publicación é transformar a percepción exterior da residencia. 

Para iso colaboran na redacción usuarios e persoal, que no terceiro número da revista (o último que saíu) transmiten as súas sensacións e inquietudes sobre o coronavirus, un mal que lles tocou de cerca. Neste centro de Bóveda deron positivo 17 residentes, actualmente aínda hai dous, e once profesionais, das que aínda hai unha infectada. 

A educadora social, Carmen Vázquez, coordinou a que de momento é a edición máis especial de todas as de Falemos que viron a luz. Nela relátanse as experiencias do persoal, os usuarios e as familias, así como dalgún outro traballador sanitario da área de Monforte que non exerce a súa profesión en Bóveda. 

"Conseguimos que a pandemia non fose a máis no centro, pero non podemos relaxarnos", di Prada

"É un bo proxecto para manter a comunicación coas familias e fomentar a colaboración dos usuarios cos profesionais. Tamén é unha vía para amosar tranquilidade e anticiparnos á fin do confinamento", explica Fernando Prada, algo máis aliviado tras épocas dun elevado nivel de preocupación. "Conseguimos que a pandemia non fose a máis non centro, pero non podemos relaxarnos", di. 

O terceiro número de Falemos está dispoñible só en soporte dixital. Pode enviarse por correo electrónico ou a través de WhatsApp. Ata o momento só saíu unha edición, a primeira, en papel. Serviu para presentar a revista e ás persoas que forman parte do día a día do centro. Tamén é posible acceder aos contidos desde a páxina web de Domus Vi. 

Falemos estreouse en xullo do ano pasado. Entón publicáronse entrevistas co director ou a cociñeira do centro e deuse conta de moitas das actividades desenvolvidas en Bóveda cada xornada. 

O novo número xa tivo a consideración de edición especial polo coronavirus. Nas súas páxinas hai textos de opinión, relatos en primeira persoa, unha descrición da desescalada particular dos usuarios e conversas con familiares e profesionais.