Axentes da Garda Civil identificaron un pescador en Quiroga, un home de 47 anos, ao que lle interviñeron 55 exemplares de troita, dos cales a maioría non daba a medida mínima, ademais de exceder o número máximo de capturas permitidas.
Segundo informou a propia Garda Civil, o suposto infractor foi identificado cando regresaba no seu vehículo particular dunha xornada de pesca no río Soldón, ao seu paso polo municipio lucense de Quiroga.
Os axentes decatáronse de que na parte traseira do vehículo levaba unha neveira portátil e, no seu interior, as 55 troitas pescadas.
O pescador foi denunciado por tres infraccións da normativa de pesca, de modo que perderá a licenza durante un ano e quedará inhabilitado para volver obtela por outro, de maneira que non poderá pisar o río nos dous próximos anos.
Ademais, enfróntase a unha sanción económica que oscila entre 100 e 3.000 euros.
Os exemplares intervidos foron entregados a unha entidade benéfica.
A Garda Civil destaca o feito de que estas infraccións foron cometidas nunha zona coñecida polo seu especial valor ecolóxico, que é xeoparque do Courel.
