O Concello quirogués iniciou as obras incluídas na primeira fase de construción do novo cemiterio municipal, así como o movemento de terras na zona que permitirá a urbanización dunha nova vía, a que unirá a cale Talos con Rego da Silva. O novo camposanto suporá dispor de 1.154 novos enterramentos.
O rexedor local, Julio Álvarez, achegouse ata o lugar onde se executan os traballos, un terreo que ten unha superficie de 3.326 metros cadrados. Esta primeira acción está financiada con 175.000 euros polas consellerías de Presidencia e Infraestruturas e Mobilidade.
Xullo Álvarez sinalou que se trata do comezo dun ambicioso proxecto no que se investirán preto de medio millón de euros. E é que para o remate total do novo camposanto municipal e a apertura desa nova rúa haberá que sumarlle á subvención dada pola Xunta outros 370.000 euros.
O alcalde indicou que se non é capaz de conseguir axudas públicas non dubidará en recorrer a fondos municipais para rematar un proxecto que ve "estratéxico".
En canto á nova rúa, a que o rexedor local cualificou como "a mellor da vila", terá unha lonxitude de 200 metros e unha anchura de 16 grazas, como recalcou Álvarez "á xenerosidade dos propietarios que cederon os terreos necersarios para que todo isto fose posible".
O alcalde mostrouse "moi satisfeito" polo inicio dun proxecto ao que lle tiña "moitas ganas, tanto política como persoalmente", e que se une a outro que consistirá no acondicionamento dunha pequena praza no centro da vila que moitos veciños queren que leve o seu nome.
