A coñecida revista de pesca e caza Jara y Sedal fíxose eco do tráxico accidente que lle custou a vida o domingo en Monforte a José Manuel Fernández, natural do Saviñao. Ao publicar a noticia nas redes sociais, varios usuarios se mofaron do home e incluso celebraron o seu falecemento por ser un cazador.
Este feito provocou indignación entre os afeccionados á caza, que interpretan os insultos como un ataque de animalistas á actividade cinexética, e na comarca, pois a vítima mortal era moi coñecida e querida. Rexentou durante anos o bar Morín, no barrio monfortino da Estación, e impulsou a creación de varios grupos dedicados ás batidas de caza maior.
"Volvía dunha batida de xabarís e levaba aos seus pobres cans amontoados nun remolque... veña, unhas lagrimitas", escribiu a primeira persoa que compartiu a noticia de Jara y Sedal. A esta publicación seguíronlle unha serie de respostas na que abundaron os insultos e improperios cara a José Manuel Fernández, así como varios comentarios irónicos.
"Ben, un menos", "estou preocupada polos cans que levaba a besta esa, oxalá eles estean ben", "fíxose xustiza" ou "o karma existe" foron algunhas das frases que se puideron ler nesta rede social achega do suceso.
A maiores, un usuario redactou "unha merda menos". Nesa mesma liña moveuse a seguinte persoa en comentar, "un asasino menos", puxo antes de referirse ao estado de saúde dos cans como a súa maior preocupación polo suceso.
Pola contra, na Ribeira Sacra as mostras de condolencia foron múltiples. Centos de persoas acudiron ao funeral de José Manuel Fernández a igrexa de San Sadurniño de Piñeiró (O Saviñao) e moitos quixeron expresar a través das redes sociais a súa tristeza polo ocorrido a tarde do domingo.
José Manuel Fernández atopábase na estrada LU-617, á altura da parroquia monfortina de Tor. Axustaba un remolque no que transportaba varios cans tras participar nunha batida de caza cando un turismo que circulaba pola zona nese momento chocou contra o seu vehículoque froito do impacto arroiou á vítima, arrebatándolle a vida.
José Manuel Fernández tiña 70 anos e era un gran afeccionado á caza e a cociña. Ao seu restaurante acudían con frecuencia moitos dos seus compañeiros de afección.
