A Xunta deu por extinguido este xoves ás 11.53 horas o incendio do Courel. En palabras do conselleiro de Medio Rural, José González, "máis que un lume, foi unha emerxencia civil".
O incendio, cambiante e cun perímetro moi extenso, arrincou o xoves 14, día en que Galicia "viviu un episodio denominado sistema convectivo de macroescala, un fenómeno propio do Mediterráneo onde se rexistraron 6.000 raios en cuestión de horas e que ocasionou ata medio cento de lumes na comunidade", apuntou.
Unhas "velocidades de propagación insólitas" desbocaron un lume que estivo a piques de darse por controlado o domingo 17. Pero esa mesma noite foron desaloxadas 23 aldeas e case 500 veciños de golpe, unha decisión "que non é habitual", sinalou González.
Nese momento, existía o temor de que o lume, que se volveu impredicible, puidese chegar a alcanzar as casas desa vintena de núcleos ou cortar as estradas, pechando as posibles vías de escape dos veciños. Os desaloxos das seguintes xornadas, en cambio, fixéronse máis por precaución.
AXUDAS. As explotacións forestais, agrícolas e gandeiras que sufran danos polos incendios poderán recibir axudas da Consellería de Medio Rural, que xestionará catro dos nove millóns de euros que mobiliza a Xunta no paquete de medidas urxentes de axuda.
Así o explicou o xoves o conselleiro durante a súa visita ao Courel, na que se reuniu co director xeral de Defensa do Monte, Manuel Rodríguez, e representantes de cinco municipios afectados.
Indicou que a convocatoria de axudas tramitarase en réxime de concorrencia non competitiva e por rateo, cuns topes que oscilarán entre os 3.000 e os 50.000 euros. As ordes saen este venres no Diario Oficial de Galicia.
Lola Castro, alcaldesa do Courel, municipio que onte aprobou para solicitar a declaración de zona catastrófica, pediu a compatibilidade de todas as axudas cos seguros. Pola súa banda, o alcalde da Pobra do Brollón, Jose Luís Maceda, celebra estas medidas e pide "que se tomen outras a longo prazo para evitar que se volvan repetir este tipo de situacións".
