Un incendio provocou importantes danos materiais nun inmoble do municipio lucense de Sober. Afortunadamente, ninguén resultou ferido.
O lume rexistrouse ao redor das 2.30 horas da madrugada. Varios particulares chamaron ao 112 Galicia para alertar dos feitos. Segundo o relato das testemuñas do suceso, víase saír lume polo tellado dun establecemento comercial na parroquia de San Pedro de Canaval. Alertaban de que o local parecía estar ocupado e o teito empezara a derrubarse.
De inmediato, desde o Centro Integrado de Atención ás Urxencias (CIAE) 112 Galicia púxose en marcha un dispositivo formado polos profesionais de Urxencias Sanitarias de Galicia-061, dos Bombeiros de Monforte de Lemos, dos axentes da Garda Civil e polos efectivos de Protección Civil de Sober.
Ben entrada a madrugada, os servizos de urxencia daban por finalizadas as tarefas de extinción e confirmaban que ninguén resultou ferido.
Tras refrescar a zona, os equipos de extinción relataron que o inmoble resultou calcinado case por completo e, por sorte, os edificios lindeiros non se viron afectados.