Un incendio calcinou na mañá deste mércores unha casa unifamiliar en Salcedo, parroquia pertencente á Pobra do Brollón. As chamas arrasaron por completo o interior da vivenda, que esta deshabitada, e o tellado. A punto estiveron de propagarse aos inmobles contiguos.
Foron os propios veciños de Salcedo os primeiros en actuar para intentar sufocar o lume. Dous deles lograron acceder ao tellado desde unha casa veciña e cunha mangueira doméstica empezaron a botar auga ata que chegaron os bombeiros do parque comarcal de Monforte, mobilizados polo 112.
A casa leva varios anos deshabitada, aínda que os seus propietarios acoden a ela cada certo tempo. Fontes consultadas indicaron que está asegurada.
Os veciños de Salcedo lamentaron o ocorrido e destacaron que se o incendio se producise durante a noite as consecuencias puideron ser fatais, pois todas as vivendas do lugar están moi pegadas.
O 112 mobilizou, alertado polos propietarios dunha das cantinas de Salcedo, aos bombeiros de Monforte, o GES de Quiroga, Protección Civil e a Garda Civil.
