A igrexa do colexio do Cardeal de Monforte quedou pequena na tarde de onte para acoller aos centos de veciños que acudiron á misa de funeral de Pilar López González, nai do conselleiro de Economía e Industria, Francisco Conde. Foi tal a afluencia que moitos tiveron que permanecer no exterior do templo, na chaira da Compañía.
Moito veciño tiveron que permanecer fose do templo dos Escolapios ao encherse xa moito antes do inicio da misa
A familia de Pilar López, ademais de recibir o agarimo dos seus conveciños, foi confortada pola práctica totalidade do Goberno galego, co seu amigo Alberto Núñez Feijóo, á cabeza. Ademais, alcaldes da comarca chegados de diferentes puntos de Galicia, incluso algúns que xa non exercen como mandatarios, desprazáronse ata Monforte para darlle un abrazo a Francisco Conde e aos seus. Tampouco faltaron deputados e senadores de diferentes forzas políticas, nin tampouco o presidente da Deputación de Lugo e alcalde monfortino, José Tomé, quen mantén unha importante amizade co viúvo, César Conde, moi coñecido e apreciado en toda a comarca de Lemos por tratarse dunha persoa moi afable que sempre destacou por axudar a todos aqueles que reclamaban o seu apoio. é César Conde, exdirector de Caixa Galicia e responsable da mítica autoescola Lemos, un referente no sur de Lugo; quen recibiu como un mazazo a perda da súa esposa.
ARCADIO VILA. Pilar López non foi a única persoa coñecida que faleceu en Monforte e que este venres recibiu sepultura. Con ela foise Arcadio Vila Díaz, aos 85 anos de idade, un recoñecido e prestixioso fotógrafo tanto no panorama galego como español.
Centos de persoas, logo de ser incinerado no Tanatorio Monforte, acudiron ata a igrexa parroquial da Estación para participar na misa de funeral.
Natural da Pobra do Brollón, Arcadio Vila era un dos homes máis veteranos de Galicia na súa profesión. Aprendeu a facer fotos moi novo da man do seu pai.
O seu cámara inmortalizó miles de momentos de Monforte e a súa empresa familiar encargouse de cubrir múltiples vodas, bautizos, comuñóns, actos sociais e eventos multitudinarios na cidade do Cabe e no resto da comarca. Esta carreira profesional fíxolle gañar unha infinidade de premios.
A súa saga continúa, pois ten dous fillos, seis netos e dous bisnetos, todos comprometidos co mundo da fotografía.
