A Consellería de Educación adxudicou unha serie de obras que teñen que ver coa mellora da eficiencia enerxética do instituto de ensino secundaria Lama das Quendas de Chantada, obras que suporán un investimento de 595.497. O delegado territorial da Xunta en Lugo, José Manuel Balseiro, explicou que era un proxecto no que traballaba desde facía tempo en colaboración co Concello que suporá unha renovación integral e a modernización das instalacións deste centro.
As actuacións centraranse na mellora tanto do interior como do exterior do instituto. Por exemplo, colocaranse novos illamento e ser cambiarán as actuais fiestras por unhas de carpintería de aluminio con rotura de ponte térmica e vidro dobre. Tamén se substituirán as persianas, que levarán illante térmico interior.
Outras actuacións non menos importantes, segundo a Xunta, teñen que ver coa mellora da cuberta do polideportivo e o cambio dos termos de auga quente dos vestiarios.
Todo iso completarase coa restauración e pintado das aulas e corredores, en todos os seus parámetros, e a renovación e modernización dos aseos, incluído novo mobiliario, fontanería e saneamento. Tamén está previsto o abrillantado do pavimento de terrazo. O delegado explicou que segundo as previsións que manexa a Consellería, as obras realizaranse no verán e estarán listas para o inicio do curso escolar. Isto é así porque os traballos teñen un prazo de execución de só dous meses e unha semana.
