A empresa Iberdrola, a través da súa fundación, asinou na mañá deste luns un acordo de colaboración coa fundación Colexio A nosa Señora da Antiga de Monforte para desenvolver un proxecto de iluminación ornamental da igrexa, recentemente restaurada pola Xunta e con outras obras pendentes relativas á posta en valor de retablos e pinturas. Iberdrola achegará 90.000 euros para "pór en valor a arquitectura e os elementos artísticos do templo", indicaron desde esta firma.
O presidente da Fundación Iberdrola España, Fernando García Sánchez, indicou que a substitución e renovación da iluminación da igrexa do colexio do Cardeal "é unha mostra máis do compromiso de Iberdrola con Galicia, a conservación do patrimonio histórico-artístico da rexión e a promoción do valor social da cultura".
Pola súa banda, o director da fundación Colexio A nosa Señora da Antiga, Javier Agudo, agradeceu o apoio de Iberdrola nun plan que considerou primordial para destacar o alto valor artístico. Tamén tivo palabras de agradecemento cara ao Goberno galego por promover a declaración do edificio como Ben de Interese Cultural (BIC) e destinar unha importante cantidade de diñeiro a traballos de restauración.
Xunto a García Sánchez e Agudo, no acto de firma do convenio estiveron outros cargos de Iberdrola, do Concello de Monforte e o delegado territorial da Xunta en Lugo.
As luces LED permitirán reducir o gasto enerxético
O plan a executar contempla o uso da tecnoloxía LED máis avanzada, que permitirá reducir o gasto enerxético e minimizar os labores de mantemento.
Ademais, destacaron desde Iberdrola, esta iniciativa contribuirá á conservación e difusión da igrexa do colexio do Cardeal. Para iso, a nova iluminación artística potenciará o significado intrínseco da súa fábrica a través da luz, cun deseño respectuoso cos valores patrimoniais e litúrxicos, acentuando a beleza das distintas fases construtivas, dos elementos singulares que conforman o conxunto, da simboloxía que representa e da mensaxe que pretende transmitir.
DESDE 2011. Unha das principais áreas de actuación de Iberdrola, a través da súa fundación en España, céntrase no coidado, conservación e posta en valor das riquezas artísticas. Así, o seu programa de iluminacións ten como obxectivo desenvolver intervencións deste tipo en edificios singulares.
Desde o ano 2011, o volume de investimento elevouse a tres millóns de euros e supuxo a mellora de máis de 40 monumentos en toda España.
