A firma Nubian Properties, que forma parte do grupo Hotusa, traballa estes días a contrarreloxo para poñer a punto os xardíns e todas as instalacións do hotel Palacio de Sober de cara á súa inminente apertura, que se producirá antes de que finalice o mes de xuño.
Trátase dunha data definitiva despois de que no pasado mes de marzo se especulase coa posibilidade de que entrase en funcionamento en Semana Santa, algo que ao final non ocorreu pola magnitude dos traballos de rehabilitación e limpeza necesarios.
Entre outras tarefas, foi preciso revisar a cuberta de todas as edificacións e o sistema eléctrico, entre outros moitos traballos de mantemento levados a cabo logo de permanecer cinco anos pechado.
Estes días, unhas 30 persoas de diferentes empresas contratadas por Nubian Properties están a deixar a punto a parte exterior e interior do complexo hostaleiro. Ao mesmo tempo, na oficina de emprego de Monforte búscase a persoas no paro interesadas en traballar en Sober. Aínda que non se especifica o centro de emprego os perfís apuntan a que se trata do establecemento turístico
POR 2,4 MILLÓNS. O hotel Palacio de Sober leva pechado desde 2014, cando a empresa construtora e xestora, Alvaher 98, entrou en concurso de acredores.
Na oficina de emprego de Monforte búscanse persoas no paro interesadas en traballar en Sober
Nubian Properties fíxose coas instalacións logo dun longo proceso xudicial e tras abonar polas mesmas 2,4 millóns de euros. Na súa orixe, o complexo funcionou coa categoría de cinco estrelas gran luxo.
Os actuais empresarios traballan no desenvolvemento do plan de explotación do mesmo, pero non se descarta que acolla hóspedes en réxime ordinario e que se especialice na organización de eventos. De feito, tamén se porá en funcionamento a cociña e o gran comedor que posúe.
RENDEMENTO. Hotusa desprazará ata Sober os seus mellores directivos para a posta en marcha do hotel, pois desexa encarrilalo e que sexa un referente para o turismo crecente da Ribeira Sacra.
Sen ir máis lonxe, está situado nunha zona excepcional, como é a capital do viño de Amandi, moi preto do embarcadoiro que asuca o canón do Sil e a tan só a dez minutos en coche de Monforte, polo que se cre que o éxito, cuns precios axustados á demanda, está garantido.
