Un home enfróntase a unha pena de 18 anos e nove meses de prisión acusado de agredir sexualmente á filla da súa expareja sentimental, menor de idade no momento dos feitos e cun grao de discapacidade do 67%. A Fiscalía solicita tamén unha orde de afastamento a 300 metros e a prohibición de comunicarse coa presunta vítima por calquera vía durante un prazo de 25 anos.
Ocorreu a madrugada do 28 de agosto de 2018, ao redor das 4.00 horas. Segundo recolle a Fiscalía, o procesado atopábase no seu domicilio no partido xudicial de Monforte de Lemos, onde residía co seu entón parella e a filla desta.
Presuntamente, o acusado dirixiuse á habitación onde a menor durmía, espertouna e levouna a un cuarto desocupado. Unha vez alí, o suposto agresor habería pechado a porta desde o interior e "inspirado polo ánimo de satisfacer o seu apetito sexual e aproveitando a súa situación de superioridade, mantivo relacións sexuais con ela a pesar da negativa desta, causándolle un gran sufrimento".
No auto de acusación engádese que a nai, ao darse conta do que pasaba, correu en auxilio da súa filla. Ao verse sorprendido, el iniciaría coa súa parella unha discusión na que adoptou "unha actitude agresiva, pretendendo botar do domicilio" a ambas.
A acusación recolle que o procesado e a presunta vítima mantiveron relacións sen o consentimento dela en múltiples "ocasións" entre o ano 2017 e agosto de 2018. Ademais, a Fiscalía afirma que o home lle mostrou varios vídeos pornográficos "coa intención de inmiscila nun contexto sexual".
Os presuntos feitos causaron á vítima unha "considerable perturbación psíquica". A menor necesitou asistencia médica e o Sergas reclama 361,59 euros.
