O pleno da corporación de Monforte aprobou na sesión que celebrou na tarde deste luns un regulamento de funcionamento do conservatorio de música municipal Mestre Ibáñez. Fíxoo cos votos do equipo de goberno, en mans do PSOE e con maioría absoluta. O seu portavoz, Iván Torres, indicou que a norma servirá para "atallar de forma definitiva a alegalidad" na que se atopaba o centro e acabar "cun despropósito".
Torrés explicou que, ata agora, o conservatorio funcionaba de forma asemblearia, que eran os profesores os que puñan as normas. Así, referiuse ao feito de que os mestres decidían cando collían vacacións, apuntábanse eles mesmos as horas extraordinarias realizadas ou decidían cando acudían ou non a traballar.
O portavoz socialista manifestou no pleno que os profesores teñen que asumir que son traballadores municipais e que xa que logo "deben axustarse ás mesmas normas que o resto dos empregados municipais". Engadiu que a única forma de que teñan o mesmo status que os profesores dun conservatorio xestionado pola Xunta é que esta asuma a xestión e cubra os custos de funcionamento do Mestre Ibáñez.
A maiores, Iván Torres cualificou de "estratexia" o enfrontamento aberto entre "algúns profesores", non todos, co Concello para que tivesen "os mesmos privilexios que os da Xunta". Dixo que nun centro municipal non pode darse este caso e que desde o equipo de goberno farán "cumprir a lei sen menoscabar os dereitos laborais".
Torres finalizou a súa intervención asegurando que o regulamento poderá entrar en vigor en setembro, coincidindo co novo curso académico.
Os partidos da oposición (PP, Esperta e BNG) votaron en contra da proposta do goberno local ao considerar que non se contou con eles para elaborar o regulamento, á vez que consideraron que era moito mellor o contido dun borrador que presentaron os propios traballadores do centro e que, de feito, fixo seu o Partido Popular, que presentou unha moción para que esa proposta dos mestres fose admitida, pero non o logrou.
Talante. Tanto BNG como Esperta limitáronse a falar sobre unha serie de puntos da normativa que non lles gustaban, polo que Torres agradeceu o talante co que trataron este asunto.
