A subdelegación do Goberno en Lugo anunciou este luns que o Ministerio de Fomento expón diversas medidas para rebaixar o nivel de perigo no quilómetro 509 da N-120. Entre elas, atópase a redución do límite de velocidade permitido neste punto concreto da estrada, que pasa por Abrence (A Pobra do Brollón).
Trátase dunha zona coñecida polo gran número de accidentes que se producen nela. Case todos son saídas de vía que suceden en días de choiva, cando o inestable firme se converte nunha auténtica pista de patinaxe para os vehículos.
Este luns o tramo fatídico da N-120 rexistrou dous sinistros. O primeiro produciuse pola mañá, ao redor das 11.40 horas, e nel viuse involucrado un camión de transporte de froita. No vehículo, que quedou tombado na cuneta contigua ao carril que vai de Quiroga a Monforte, viaxaban dúas persoas que resultaron feridas leves.
O segundo tivo lugar ás 18.18 horas. Ocorreu exactamente no mesmo punto. A vítima foi unha muller duns 30 anos de idade que viaxaba aos mandos dun Citroën C3. As súas feridas tamén foron de carácter leve.
A pesar da avalancha de accidentes, a subdelegación do Goberno apuntou que o proxecto para rehabilitar o firme da estrada áchase aínda en proceso de redacción. A curto prazo só está previsto aplicar un tratamento de mellora da adherencia. A obra está contratada, pero non pode executarse mentres chova.
CRÍTICAS. A situación en Abrence preocupa moito ás autoridades locais. O alcalde de Brollón, o nacionalista José Luis Maceda, anunciou que escribirá a Fomento para pedirlle que actúe.
"Calquera día vai morrer alguén, é indignante", sinalou o rexedor. Maceda afirmou que o ministerio "xa coñece o que pasa, se non arranxan a estrada é porque non queren". O alcalde da Pobra do Brollón aseverou que "ultimamente case saímos a un accidente por día".
O quilómetro 509 da N-120 sitúase nunha curva na que se produciron catro saídas de vía en menos dunha semana. A estrada non drena ben e a auga acumúlase en moitos puntos, formando balsas cando chove intensamente, como este luns. O estado do firme tampouco é positivo, pois presenta unha importante cantidade de gretas e fochancas.
