O xeoparque Montañas do Courel, recentemente recoñecido como tal pola Unesco, participou nunha reunión en Sevilla á que acudiron representantes de espazos similares de 24 países de Europa. Alí foi onde os directivos do grupo que aglutina os concellos de Quiroga, Ribas de Sil e Quiroga deron a coñecer unha nova iniciativa, unha ruta denominada Aldeas Paleozoicas para divulgar tanto o legado etnográfico como xeolóxico que atesoura este territorio.
Trátase, explicaron os promotores da iniciativa, de achegarse ata os pobos de Moreiras de Abaixo (Ribas de Sil), Campodola e A Seara (Quiroga) e Froxán, Seceda e Céramo (O Courel). O nexo común é que as casas tradicionais foron construídas utilizando rocas da época paleozoica, como cuarcitas, lousa ovíricas ou calcarias, todas pedras cunha antigüidade media de 400 millóns de anos, cando se formou Galicia tras emerxer do mar. Nalgúns dos seus sillares pódense apreciar antiquísimos fósiles mariños
Montañas do Courel ten postas grandes esperanzas nesta ruta, tendo en conta que é sinxela ao poder achegarse a esas seis aldeas en coche. Incluso, é máis que recomendable, pois completa suma 90 quilómetros.
A proposta de Montañas do Courel é que o visitante comece onde lle apeteza, coñeza a singularidade das casas destas aldeas e percorra a súa contorna para gozar da natureza, a paisaxe e os restos xeolóxicos dos arredores.
O grupo xa traballa na elaboración duns folletos informativos e na confección de sinais informativos para marcar os lugares de interese.
Desde a directiva de Montañas do Courel manifestaron que se trata de sumar recursos a un territorio declarado pola Unesco geoparque mundial que permita manter este selo de calidade ao longo do tempo, á vez que se consegue atraer máis turistas á zona.
DÍA DO TURISMO. A Deputación de Lugo conmemora este xoves o Día Mundial do Turismo cunha actividade para os máis pequenos no xeoparque como sinal de recoñecemento ás actuacións que se desenvolven neste enclave.É unha actividade dirixida aos escolares do CEIP San Clodio, de Ribas de Sil, para que coñezan de cerca os segredos e curiosidades que esconde este lugar
Asisten, entre outros, a deputada de promoción do territorio, Pilar García Porto; o alcalde de Ribas de Sil, Miguel Sotuela, e diferentes membros do equipo de goberno deste concello e de Quiroga e O Courel.
