O conselleiro de Medio Rural, José González, destacou na clausura da XXIV Asemblea Xeral da Conferencia Española de Consellos Reguladores Vitivinícolas (CECRV), celebrada en Monforte, que o viño é un dos motores de progreso, cohesión e futuro na comunidade galega, subliñando o seu importante peso na economía, pero tamén no aspecto cultural e de tradición.
Neste sentido, José González sinalou que o viño é o principal elemento dinamizador dos territorios que conforman os distintos selos de calidade deste campo produtivo, cinco en Galicia.
Por iso, non dubidou en indicar que é esencial unir sinerxías con outros sectores, como poden ser o turístico, tanto na vertente natural como cultural ou paisaxística.
González tivo palabras de énfase para as rutas dos viños, que conxugan todos estes valores e potencian a imaxe de Galicia Calidade, cunha especial mención cara á viticultura heroica da Ribeira Sacra, un territorio que destaca polos seus antigos viñedos colgados en ladeiras de ata 85 graos de inclinación.
Tamén aludiu á estratexia de dinamización económica, territorial e turística das comarcas vitivinícolas de Galicia, coa que se persegue mellorar o posicionamento dos viños galegos no seu conxunto, reforzar a súa imaxe de marca e identidade vinculada aos diversos territorios nos que se producen e mellorar a eficacia da promoción e comercialización en conxunto de produtos turísticos vinculados ao sector vitivinícola.
COMENTARIOS. Os representantes da práctica totalidade das denominacións de orixe vitivinícolas de España, que participaron durante os últimos dous días no encontro celebrado en Monforte, comentaron entre eles a aposta decidida do Goberno galego por potenciar a viticultura de calidade e ao mesmo tempo sumarlle un valor engadido, neste caso, a paisaxe e outros elementos culturais co fin de atraer aos amantes do chamado enoturismo.As palabras do conselleiro de Medio Rural foron recibidas con enorme agrado polos representantes do sector. Entre os presentes, en pequenos círculos, falouse de transmitir estas ideas aos seus respectivos gobernos autonómicos para que tomen nota do que se fai en Galicia co fin de que imiten accións para potenciar os seus territorios
