O Boletín Oficial de Estado (BOE) publica este mércores investimentos por parte do Goberno de España por valor de 15,6 millóns de euros para realizar melloras na liña ferroviaria entre Monforte de Lemos e Ourense, co obxectivo de mellorar as prestacións neste trazado.
A subdelegada do Goberno en Lugo, Isabel Rodríguez, informou de que o BOE publica a licitación por parte de Adif das melloras previstas na sinalización e as telecomunicacións deste trazado, así como a formalización do contrato para reparar os desmontes nun tramo do mesmo. Estes traballos, aclarou, enmárcanse dentro das actuacións previstas por Adif para mellorar o trazado ferroviario Ourense-Monforte-Lugo, co obxectivo final de adaptalo ás prestacións de alta velocidade.
O contrato de maior contía é a execución do proxecto para mellorar a sinalización e as infraestruturas de telecomunicacións, que ascende a 12,6 millóns de euros e que forma parte dun conxunto de actuacións relacionadas co "cambio de electrificación de 3kV a 25 kV no traxecto Monforte-Ourense, para aumentar a fiabilidade, capacidade e competitividade do tramo", precisou Rodríguez.
En canto ao contrato para reparar os desmontes entre o quilómetro 34,7 e 43,22, foi adxudicado á empresa Taboada y Ramos por 2,9 millóns de euros, cun prazo de execución de 13 meses.
