Os bos presaxios cumpríronse. As condicións atmosféricas favorables e a escaseza de enfermidades fixeron posible a mellor vendima na Ribeira Sacra desde que o consello regulador empezou cos rexistros a mediados da década dos noventa.
A de 2019 non só é a colleita máis produtiva, senon que tamén destaca como a máis alta. Máis de 90 adegas amparadas pola denominación de orixe traballaron durante 51 días. Entre o 28 de agosto (Adega Damm, en Amandi, foi a firma máis madrugadora) e este venres recolléronse en todas as subzonas da comarca un total de 7.262.831 quilos de uva.
En agosto, o consello regulador xa prevía que a colleita desta tempada superaría os sete millóns, unha barreira que ata a data non se excedeu. A mellor marca ostentábaa o ano 2011, cando entraron en adega 6.999.560 quilos de froita.
O dato é moito mellor se se compara coa uva sacada das cepas hai un ano. En 2018, a vendima oficial pechouse en 6.170.995, é dicir, que a produción deste exercicio supera en máis dun millón de quilos a de todo o anterior.
A evidente mellora dos números a manifesta, sobre todo, a uva mencía. Esta variedade tinta volveu ser, con diferenza, a inquilina máis habitual dos viñedos da Ribeira Sacra. Segundo os datos do consello regulador, vendimiáronse 6.000.233 quilos deste tipo.
TODAS AS UVAS. A mencía é a única variedade que supera, e faio por moito, o millón de quilos. A seguinte nesta particular clasificación é a godello, branca, da que se colleitaron un total de 422.886 quilos.
Este ano os colleiteiros da comarca introduciron en adega as variedades tintas brancellao (49.405 quilos), merenzao (62.842), caíño (30.920), grao negro (2.057), garnacha (388.306), mouratón (11.656), sousón (109.183) e tempranillo (62.217).
A anada complétase coas uvas brancas albariño (71.125 quilos), branco lexítimo (3.420), doa branca (5.648), loureira (2.605), torrontés (3.675) e treixadura (36.653).
Desde o consello regulador subliñaron que se subiu de media un 10% na produción respecto doutros anos, mesmo incremento do prezo ao que se pagou a uva, que chegou a 1,20 euros.
