Un taxista de Monforte de Lemos resultou ferido na tarde deste mércores tras envorcar o vehículo que conducía, e no que viaxaba só, en Silleda.
O incidente produciuse na estrada EP7201 que une Cachafeiro coa capital trasdezana, nunha zona de curvas a uns dous quilómetros do centro urbano.
Os Bombeiros recibiron o aviso ao redor das 17.30 horas e participaron nos labores de evacuación do condutor, aínda que non foi preciso excarcerar.
O ferido foi trasladado nunha ambulancia do 061 para recibir asistencia sanitaria. En principio, o seu estado non revestía gravidade.
A Garda Civil de Tráfico e un guindastre tamén acudiron ao lugar do accidente.