A feira do aceite de Quiroga terá só 200 persoas ao mesmo tempo

A comisión organizadora da XXI Mostra do Aceite de Quiroga, que terá lugar o 30 de maio na localidade de Bendilló, pechou o programa de actos deste festexo declarado de interese turístico pola Xunta. Destacan as medidas de seguridade sanitarias, pois no recinto feiral, a pesar de estar ao aire libre, non poderán estar máis de 200 persoas ao mesmo tempo. Os organizadores estiman que se poderá renovar o aforamento con frecuencia pois, destacaron, o normal é que un visitante non pase máis dunha hora no lugar.

Ademais, darase preferencia de entrada a aquelas persoas que concerten cita previa chamado ao Concello, algo aconsellable, dixeron desde a organización.

En canto á tradicional demostración de como se obtiña aceite das olivas do val na antiga almazara de Bendilló, o Concello decidiu mantela, pero sen público no interior da pequena construción. Os asistentes poderán seguir todo o proceso por streaming. Nas inmediacións da almazara instalarase unha enorme pantalla de televisión para seguir o proceso de obtención do aceite

Este ano participarán catro olivicultores nunha mostra na que todos os produtos que se poñan á venda, como outros alimentarios típicos da comarca, terán que contar co seu correspondente rexistro sanitario autorizado polo órgano competente.