Feijóo en Sober: "O Goberno debe ser previsible e non podar se non toca"

12/mar./20 - 13:47 Actualizado: 16/mar./20 - 14:25

Seguinte

O candidato do Partido Popular á reelección como presidente da Xunta, Alberto Núñez Feijóo, pediu este mércores en Sober o voto á súa formación o 5 de abril para garantir "un Goberno previsible, que non pode cando non toque nin plante cando sexa mellor agardar". Fíxoo nas instalacións de Regina Viarum, cos canóns do Sil ás súas costas.

Neste escenario situado en plena Ribeira Sacra, Feijóo empregou un símil vitícola para reivindicar o seu modelo de xestión á fronte da Xunta. "Fuximos dos populismos e apostamos por unha fórmula que permite saber quen goberna e a quen hai que pedir responsabilidades", sinalou o candidato dos populares.

Feijóo atacou os seus opoñentes políticos por considerar que o seu obxectivo é "estar na Xunta, non gobernar", e afirmou que a única alternativa ao PP é "un multipartito de sete forzas: as integradas en En Común, o PSOE e o BNG". Todos eles, indicou, "dan por feito que imos gañar, pero queren impedir que gobernemos".

O PP sitúa o coidado da familia, a atención á xente nova, a economía e o respecto polo medio ambiente como alicerces do seu programa

Ante numerosos membros do PP autonómico e comarcal, Feijóo mostrou algunhas liñas dos seus plans para esta década. Os populares queren basear o seu programa en catro alicerces: o coidado da familia, a atención á xente nova, a economía e o respecto polo medio ambiente.

Neste último apartado Feijóo fixo especial énfase. Sinalou que Galicia "é máis verde que cando chegamos hai once anos porque somos referentes en políticas medioambientais e en competitividade". O candidato popular destacou tamén que a súa é "a única comunidade autónoma que conta cunha estratexia de cambio climático e enerxía 2050 e un plan de economía circular 2020-2030".

Núñez Feijóo reivindicou, ademais, o sistema de prevención de incendios forestais galego como "o mellor de Europa" e situou Galicia como a terceira rexión de España "que máis está a reducir as emisións de CO2 á atmosfera".

En defensa da súa política ambiental, Feijóo falou da ordenación do territorio. "No 2009 só o 10% dos concellos tiñan plan xeral e hoxe xa son 106", dixo.

Impostos | "Son menos e hai máis servizos"

Alberto Núñez Feijóo subliñou que o medio rural se beneficiou da súa política tributaria. "Chegou a máis de 70.000 fogares galegos. Mozos, familias numerosas e persoas con discapacidade non pagan impostos pola compra dunha vivenda nin por vender, mercar ou permutar parcelas no noso rural", precisou. A iso, o candidato popular engadiu a existencia de máis servizos. "Por primeira vez, as familias do rural dispoñen de casas niño e casas do maior" e anunciou que a Xunta "traballa para unha mellora da cobertura 4G e de internet".

Enerxías renovables
Núñez Feijóo anunciou que a potencia eólica instalada aumentará nun 15% e que ao final deste ano haberá 8.000 caldeiras de biomasa. "Máis do 82% da nosa electricidade provén de fontes renovables", concluíu.