Maribel Sánchez Montenegro, exconcelleira no Concello de Monforte e deputada no Parlamento de Galicia polo BNG, faleceu este xoves aos 58 anos logo dunha longa batalla contra o cancro.
Era natural de Monterroso e os últimos anos desempeñou o seu traballo como profesora de educación infantil no colexio Eloísa Rivadulla de Chantada. Antes traballou en centros de Monforte, Ribas de Sil ou Quiroga.
En Monforte era moi coñecida pola súa faceta política. Entre 2007 e 2009, época na que Severino Rodríguez era alcalde da cidade, responsabilizouse da área de medio ambiente. En 2009 pasou a formar parte do Parlamento de Galicia, tras as eleccións autonómicas celebradas ese ano. Estivo no Hórreo toda a lexislatura, ata 2013, e logo abandonou a primeira liña política.
Os que coñeceron a Maribel Sánchez Montenegro falan dela como unha muller agradable, atenta e moi amable. A súa carreira política, aínda que curta, valeulle multitude de eloxios pola súa gran capacidade de traballo, calidade pola que tamén destacaba na docencia.
