Un home de 59 anos foi trasladado este sábado a Vigo en estado moi grave tras sufrir un accidente co seu tractor. Ao intentar colocar unha cisterna de auga, a toma de forza atrapouno pola roupa. Puido salvar a vida grazas a que o vehículo calouse.
O suceso ocorreu pola mañá no lugar de Barrio, na parroquia de Muradelle. O home atopábase só e os veciños escoitaron os berros. Foron eles quen chamaron ao servizo de urxencias do 112, que mobilizou ao 061, os bombeiros de Chantada e Garda Civil. Tamén acudiu un axente forestal.
Segundo puido saber este diario, a vítima non perdeu en ningún momento a consciencia, aínda que presentaba feridas e lesións moi severas nunha perna. Os bombeiros sacaron o home do tractor e un helicóptero medicalizado do 061 evacuouno, en primeira instancia, ao hospital de Ourense, onde se decidiu posteriormente o seu traslado a Vigo.