O grupo Akatavino, que promove unha guía e un dos concursos de viños máis coñecidos a nivel internacional, elixiu a etiqueta do Mencía Selección Malcavada da denominación de orixe Ribeira Sacra como unha das dez mellores imaxes dos viños que se presentaron á última edición do certame Civas.
En concreto, o traballo, que é unha obra do deseñador e catador Humberto Loureiro, colocouse no posto número tres. No dous quedou un traballo de Pablo Vidal para o viño de Valdeorras Maldito e no primeiro posto situouse a etiqueta do caldo de Yecla Atlán &Artisan Espistem.
O ranking elaborárono os catadores que formaron parte do Concurso de Viños AkataVino Catadores de España (Civas) entre as etiquetas dos 400 viños finalistas.
O premio ao deseño é un apartado especial do certame. Nesta categoría os catadores esquécense do que hai no interior das botellas e valoran o exterior. Akatavino puxo en marcha esta sección porque desde o grupo consideran que a relación entre o viño e o deseño é cada vez máis importante e a imaxe é crucial para situarse no mercado.
Malcavada apostou por esta etiqueta xa no ano 2012. Segundo explica Loureiro, todo comezou cun deseñou sobre un papel en branco. Non había elementos previos que manter nin ningunha outra directriz, así que apostou por unha etiqueta con fondo branco e con forma de escaleira na que un carretador, un dos elementos máis característicos da vendima en Ribeira Sacra, vai colocando unha cesta ao ombreiro e subindo a pendente. Segundo vírase a botella vai pasando a secuencia e ao final hai unha explicación do traballo de Malcavada, a súa filosofía e o seu respecto á viticultura heroica. A etiqueta conta de xeito claro a historia da adega e a esencia da denominación de orixe.
Para esta obra, Loureiro inspirouse na dinámina cinematográfica e a animación. A innovación na forma da etiqueta suavizouse coa sinxeleza de cores e o conxunto fixo que a imaxe de Malcavada chame a atención dos consumidores. "é unha botella que todo o mundo recorda", insiste Loureiro, "a pesar de que o deseño xa ten uns anos segue funcionando".
O profesional considera que nunha primeira compra a aparencia da botella é primordial e que cada vez as adegas preocúpanse máis do deseño. é complicado en firmas tan pequenas como as da Ribeira Sacra dedicar moitos fondos a este tema, pero cada vez faise máis esforzo niso.
Loureiro conta que nas etiquetas tamén hai modas e tendencias e que agora hai certa regresión ao clasicismo.
