Non é a primeira vez que a estrada LU-P-1002 acapara as críticas dos veciños de Carballedo. Hai dous anos que advertiron do elevado nivel de deterioración do seu firme, que a fan incluso perigosa para a circulación nalgúns tramos. O problema continúa e unha das últimas iniciativas encabezouna un veciño que conduce un coche adaptado por unha discapacidade.
As fochancas son de tal tamaño que en varios tramos é necesario invadir o carril contrario ou reducir a velocidade case ao máximo para que os vehículos non sufran deterioracións. Aínda así, varios usuarios da vía tiveron que pasar polo taller con severos estropicios nos seus coches.
Trátase da estrada que une a capitalidade do municipio, A Barrela, con Cartelos. Nesta zona reside o veciño afectado, que pide o arranxo integral da infraestrutura para que a súa circulación pola mesma, que é practicamente diaria, sexa máis cómoda. Segundo describe, padece un grao de discapacidade alto e sente molestias importantes cada vez que pega un volantazo ou invade o carril de sentido contrario para esquivar as inmensas fendas.
Un dos tramos máis conflitivos atópase nunha curva. Nada máis saír dela, os usuarios atópanse con varias fochancas de gran tamaño e moitas veces, cando se cruzan con strong <>un vehículo que viaxa en dirección contraria, ven obrigados a deterse e esperar a pasar ao carril contrario.
O curioso é que a escasos metros da LU-P-1002 pasa o tramo recentemente aberto da A-56, entre A Barrela e San Martiño (Ourense). O firme dunha contrasta de xeito radical co da outra. O asfalto impoluto propio dunha autovía que acaba de ser inaugurada é o polo oposto ás fochancas que parecen cráteres da estrada provincial.
Antecedentes. Unha asociación de veciños chamada Arransallo protestou varias veces para intentar que se arranxe a estrada, de titularidade provincial. Por ela pasan cada día numerosos tractores e camións para traballar nas granxas e explotacións que hai polos arredores, nos que tamén hai unhas instalacións que pertencen á cooperativa Aira.
O colectivo enviou varios escritos ao Concello aos que agora se unen os correos electrónicos á Deputación emitidos polo veciño cuestionado por este diario, que demanda solucións de forma desesperada. Recoñece que de cando en vez levan a cabo labores de bacheo, pero advirte de que o seu efecto dura moi pouco tempo, un problema que se dá igualmente na estrada nacional N-540.
