A consultora internacional Wine Intelligence elaborou un informe para catalogar os mercados do viño máis atractivos actualmente a nivel internacional. Para a súa confección usou un modelo estatístico que incorpora unha serie de medidas económicas, de mercado do viño e do comportamento do consumidor. O resultado foi unha clasificación que encabeza Estados Unidos.
Segundo a consultora, no seu informe Global Compass, o país norteamericano segue sendo o mercado máis atractivo debido ao seu tamaño e valor, aínda que o seu crecemento en volume e as medicións da actitude do consumidor suxiren que o longo período de crecemento que experimentou pode estar chegando ao seu fin.
Tal análise vénlle como anel ao dedo á denominación de orixe Ribeira Sacra. O pasado ano exportou a Estados Unidos 634,36 hectolitros de viño, sendo o país onde máis venden, con moito, as adegas de Ribeira Sacra. Con todo, houbo un lixeiro descenso con respecto a 2016, cando foron 669,58 hectolitros.
Os catro seguintes países máis atractivos a nivel mercado do viño son, por esta orde, Alemaña, Canadá, China e Francia.
Non é así no caso da Ribeira Sacra, pois no país germánico viuse como as cifras de venda caeron, pasando de 78 hectolitros en 2016 a 29 o pasado ano.
A análise de Wine Intelligence si se cumpre no caso de Canadá, onde se colocaron 102 hectolitros de viño, tres veces máis que en 2016.
China está aí, cun mercado que absorbe 7.422 litros, por baixo do ano anterior; mentres que Francia comeza a interesarse moitos polos caldos que se elaboran na comarca, pois o pasado ano recibiu case 76 hectolitros, o triplo que no período anterior.
