Esperta Monforte e o BNG compartirán o grupo mixto do pleno durante os próximos catro anos. Así o anunciou o alcalde, José Tomé Roca, durante a rolda de prensa na que falou das propostas que o equipo de goberno fará na primeira sesión.
O rexedor sinalou que a lei reguladora da administración local de Galicia obrígao a levar a cabo esta iniciativa. Nela establécese que para contar con grupo propio é necesario obter nas eleccións un mínimo de dous concelleiros, ao que non chegan nin Esperta nin BNG, que contan con un cada un.
Isto supón que ambos os portavoces, Maribel García e Emilio Sánchez, terán que compartir o tempo de intervención. Os únicos partidos con grupo propio no pleno serán o PSOE, que ostenta a maioría absoluta con once edís, e o PP, que ten catro.
Ademais, Tomé sinalou que haberá un pleno cada mes e que se formarán dúas comisións informativas. Unha será para tratar asuntos do pleno e outra, de Facenda e Especial de Contas. En ambas haberá dez membros: seis do PSOE, dous do PP, un de Esperta e outro do BNG.
