Cando a Unesco enviou o pasado verán a dous observadores a avaliar a candidatura de Montañas do Courel a xeoparque mundial, estes quedaron gratamente sorprendidos co apoio popular mostrado á declaración internacional. No colexio de Quiroga parecen decididos a que esta valoración non quede nunha boa impresión inicial e decidiron dedicar a práctica totalidade das actividades desenvolvidas no vixente curso a esta temática.
A directora do centro, Ana Núñez, anunciou para o mércores 30 o descubrimento dun mural coa fauna e flora do xeoparque como protagonistas. Esa xornada conmemórase o Día Escolar da Non Violencia e a Paz e a temática da creación dos alumnos tratará a convivencia pacífica da natureza (entre a que se achan osos ou lobos) da comarca co ser humano no caso de que a Unesco outorgue a Montañas de Courel a ansiada distinción.
"Levamos todo o curso traballando sobre o xeoparque mundial co obxectivo de que os nenos teñan fondos coñecementos sobre o noso terreo", indicou Ana Núñez. As actividades son múltiples, variadas e relacionadas con todas e cada unha das materias que se imparten no colexio.
Os alumnos elaboran un mural para o Día da Paz no que se reivindica a convivencia do ser humano coa natureza
Cada alumno recibe unha credencial por cada evento no que participa e ao final do curso entregaráselles un diploma que os acreditará como expertos no xeoparque mundial. "En total, hai 20 actividades adicadas a obter estas credenciais", matiza a directora do colexio de Quiroga.
EXCURSIóNS. Este amplo programa sobre o geoparque inclúe múltiples saídas pola comarca para coñecer a área que aspira á distinción da Unesco. Os nenos visitaron, por exemplo, o museo xeolóxico de Quiroga.
Nas súas instalacións descubriron algunhas das pezas máis significativas que garda o centro, como o fósil do oso cavernario, e recibiron charlas do seu director, Ramón Vila, acerca dos vestixios atopados na comarca. Os escolares estiveron tamén na aula da Natureza de Moreda (O Courel).
Ademais das excursións destinadas a coñecer museos, miradoiros e demais puntos de interese da zona aspirante a xeoparque mundial, cada festividade aprovéitase para inxectar coñecementos aos máis pequenos de Quiroga sobre os seus arredores. Ana Núñez destaca as postais de Nadal, nas que estivo moi presente o xeoparque, ou as cabazas de Samaín. "Houbo creacións realmente creativas e divertidas", concluíu a docente.
Todas estas actividades compleméntanse con vídeos ou xogos como o que levou a cabo o pasado decembro. Nel, os alumnos debían mover uns pequenos robots por dous taboleiros de 64 casas cada un nos que se mostraban os principais lugares de interese e toda a flora e a fauna do espazo comprendido pola candidatura Montañas do Courel.
