A cafetería do instituto Lama das Quendas de Chantada foi obxecto dun roubo en pleno recreo. Un home entrou na oficina onde as responsables gardaban o diñeiro e levou a recadación de todo un mes.
Todo ocorreu mentres unha das traballadoras atendía aos alumnos do centro nunha das dúas barras, a habilitada para a venda de bocadillos. Nun momento de importante carga de traballo, o ladrón aproveitou para acceder polo mostrador onde se dá á nenos auga e froita ao espazo interior reservado ás traballadoras e levou unha caixa con todo o diñeiro que había dentro.
Fontes consultadas sinalan que o autor do roubo tivo que ser alguén que coñecía o instituto por dentro, pois pola contra non sabería nin da existencia desta oficina nin de onde gardaban a recadación as persoas encargadas da cafetería, que este luns interpuxeron unha denuncia no cuartel da Garda Civil.
Durante o suceso non houbo que lamentar ningún incidente violento. O home entrou e saíu do edificio sen ser apenas visto.
