A importante redución das partidas destinadas a que tome forme canto antes a autovía A-76 entre Ponferrada e Ourense por Monforte puxo en pé de guerra aos empresarios da comarca leonesa do Bierzo e aos que operan na ourensá de Valdeorras. Ambos os colectivos consideran que o Goberno de Pedro Sánchez reduciu de tal xeito as partidas destinadas ao proxecto nos Orzamentos Xerais deste ano que non ven factible un verdadeiro desenvolvemento de tan demandada infaestructura.
A actitude dos industriais destas dúas comarcas contrasta co silencio dos seus homológos monfortinos e co parecer do alcalde do municipio, o socialista José Tomé, que deu por boas as contas, sobre todo a partida de 422.000 euros destinada a elaborar o proxecto de circunvalación da A-76 ao seu paso por Monforte.
Trátase, sobre o papel, dunhas variantes de oito quilómetros de lonxitude que partirá da parroquia de Bascós e acabará á altura da de Distriz.
"MOI NEGATIVO". No Bierzo, o delegado do Círculo Empresarial Leonés (CEL), Silvino Abella, cualificou de moi "negativo" que nas contas do Estado contemplouse unha partida de 822.290 euros para pór a primeira pedra da A-76 na súa zona, xa que, destacou, nada ten que ver cos 4.810.620 euros contemplados no Orzamento do pasado ano.
Abella manifestou que xa son recorrentes "as longas" que se lle están dando a esta infraestrutura viaria, recordando que levan uns 20 anos esixíndoa sen que, a pesar da insistencia dos axentes socioeconómicos e políticos dos municipios polos que ten que pasar a estrada, o Ministerio de Fomento axilice o plan e dóteo do orzamento necesario para convertelo, máis pronto que tarde, nunha realidade.
Neste sentido, os socialistas leoneses falaron de emendar os Orzamentos Xerais do Estado para este ano a fin de que se contemplen maiores partidas.
SEGUIMENTO. Outro asunto posto sobre a mesa, neste caso polos empresarios da comarca de Valdeorras, é adiantar a reunión da comisión de seguimento da A-76 prevista para finais de marzo co fin de que teña lugar en febreiro.
A idea é tomar unha decisión conxunta e solicitar unha nova reunión co secretario xeral de Infraestruturas a fin de que aclare a postura do Ministerio de Fomento sobre a A-76. Meses atrás, desde este departamento, deran esperanzas sobre o desenvolvemento da estrada.
O rexedor monfortino mostrouse satisfeito coas cantidades destinadas a mellorar a liña ferroviaria entre a cidade do Cabe e Lugo. Indicou que se contemplaron "cousas moi importantes", como a renovación da liña e a execución de variantes neste traxecto, para o que hai 8,8 millóns de euros; pero tamén polo feito de ser incluída unha partida de 5,1 millóns para a electrificación da vía. José Tomé engadiu que tamén se conta con orzamento para a liña Monforte-Palencia.
