A empresa lucense Agroamb, considerada en Galicia referente no impulso da economía circular, converteuse na primeira de España en patrocinar servizos ecosistémicos grazas ao seu apoio ao proxecto de conservación dos bosques naturais levado a cabo na Devesa da Rogueira, no concello de Folgoso do Courel.
A iniciativa está promovida pola consultora Enxeñería Forestal Asefor e a comunidade de montes veciñais en man común de Rogueira e Cabana. O seu traballo ha convertido este espazo natural no primeiro bosque de España e o segundo de Europa en lograr a certificación FSC en Servizos Ecosistémicos, unha acreditación que pon en valor os beneficios que os ecosistemas achegan á sociedade en termos de saúde, economía e calidade de vida.
No caso concreto de A Devesa da Rogueira, a distinción enxalza a achega desta "xoia ambiental" á preservación da biodiversidade e desde Agroamb sinalan que é unha inquietude "moi presente" na súa filosofía desde o seu nacemento hai dúas décadas. Para o CEO da compañía, Severiano Ónega, o acordo é "unha excelente oportunidade para protexer o patrimonio natural da nosa contorna, dando, ademais, relevancia ao labor dos comuneiros, que souberon xestionar estes marabillosos montes durante toda a súa vida sen provocar alteracións no ecosistema".
Agroamb engadiu que o convenio supón igualmente un reforzo ao seu compromiso co desenvolvemento sostible do medio rural en Galicia.
Concienciación. Agroamb indicou que o patrocinio axuda a transmitir a importancia de coidar o capital natural e preservar a biodiversidade. Aos beneficios obtidos destas actividades chámaselles Servizos Ecosistémicos.
A empresa considera que hai unha necesidade "planetaria" e explica que a conservación de ecosistemas reduce a vulnerabilidade fronte a incendios, pragas ou enfermidades emerxentes, ademais de potenciar a independencia ante as crises dos mercados.
