O Concello de Quiroga cedeu aos traballadores da empresa Valdegodos, encargada do mantemento da residencia de maiores que funciona no municipio e que conta cuns 90 usuarios maiores de 80 anos, o centro social da terceira idade para que o usen como vivenda temporal.
Os empregados de Valdegodos decidiron recluírse xunto aos residentes co fin impedir que estes cheguen a infectarse.
Así, no centro social, que está separado apenas tres metros do complexo residencial, foron instaladas camas e outros servizos para que os 35 traballadores sentan o máis cómodos posible. O alcalde quirogués, Julio Álvarez, eloxiou a decisión adoptada polos traballadores e a empresa.
"É encomiable o seu compromiso cos maiores que temos no noso centro para que teñan o mínimo risco posible de contaxio", destacou. Tamén dixo que Valdegodos contará con todo o apoio do Concello para que a residencia funcione á perfección. "Estamos ao seu servizo", manifestou Julio Álvarez.
O rexedor local creou semanas atrás unha comisión de crise na que están os tenentes de alcalde Ana Núñez, Loli Sánchez e Ángel Rodríguez; os xefes da Policía Local e do Grupo de Urxencias Supramunicipal (GES) e o secretario do Concello.
Entre as decisións adoptadas por este grupo de traballo estivo reforzar o servizo de recollida de lixo e estudar a casuística das familias que se atopan en exclusión social para determinar o mellor modo de protexelas.
