A actividade converteuse nun clásico do verán en Monforte. A tempada de paseos en barca polo río Cabe está aberta ata o 15 de setembro e espérase que, como cada ano, supoña unha importante fonte de usuarios, tanto veciños como persoas chegadas desde outros puntos de Galicia e de España.
A xestión do servizo asúmea o club Quixós de piragüismo, cuxas instalacións se sitúan xunto ao embarcadoiro do Cabe no parque dos Condes. Este será precisamente o punto de inicio de cada percorrido, que terá unha duración de media hora por un prezo de 3,25 euros, do mesmo xeito que en anos anteriores.
Por razóns de seguridade, en cada travesía só permitirase un máximo de seis persoas. Poderán facerse de luns a venres entre as 18.00 e as 22.00 horas. Os fins de semana e días festivos, o servizo amplíase e habilitaranse viaxes pola mañá, entre as 11.00 e as 14.00 horas.
En total, os interesados nestes paseos dispoñen de seis barcas para facelo. Segundo destacou o coordinador do servizo, José Luís Saco, algunhas das embarcacións reparáronse nos últimos tempos e, recentemente, fixéronse dúas novas para polas a disposición do público. As máis antigas roldan os doce anos.
Ata a data, a afluencia non foi moi alta, como recoñecen o propio Saco e Santi Díaz, adestrador do Quixós. "Aínda non hai moita xente que saiba que se iniciou o servizo. Aínda así, debido ás festas de San Antonio, xa tivemos algúns usuarios", sinalaron desde o Quixós.
José Luís Saco destaca que é en xullo e en agosto cando máis xente se sobe ás embarcacións dispostas a ter unha perspectiva de Monforte desde o río e que a maioría é de fóra da comarca. A persoa responsable da actividade sinala que o ano pasado a actividade tivo moito éxito entre o público chegado desde Euskadi. "Veñen persoas de todas partes, pero notamos moita presenza de xente procedente do País Vasco", indicou.
Sobre a travesía, Saco afirmou que a maior parte de valoracións son positivas. "Destácase moito que é unha actividade relaxante e atractiva. Por suposto, son os propios usuarios os que manexan as barcas", comentou José Luís Saco.
O CONCELLO. O alcalde de Monforte, José Tomé, coincide ao sinalar as travesías polo Cabe como "fermosas, cómodas e sen correntes". O rexedor destacou ademais a importante cultura fluvial da cidade, a pesar de que, di, esta construíuse de costas ao río. "Sempre se usou para traballos cotiáns, como lavar a roupa", sinalou.
