A Consellería de Cultura e o Grupo Hotusa acaban de renovar a súa colaboración en materia de FP Dual en Galicia, coa firma dos convenios para a impartición de seis ciclos formativos en cinco Centros Integrados de Formación Profesional (Cifp) e tres IES de Galicia.
O conselleiro Román Rodríguez e o presidente de Grupo Hotusa, Amancio López, referendaron este venres en Chantada os acordos de colaboración polos cales se ofertan un total de 175 prazas formativas na modalidade Dual (que compaxina a formación nos centros educativos con actividade profesional remunerada en centros de traballo do grupo hostaleiro) para estes ciclos.
Deste xeito, no IES Val do Asma en Chantada, iniciarase a terceira promoción de titulados nos ciclos superiores de Administración e finanzas, de Axencias de viaxe e xestión de eventos e de Desenvolvemento de aplicacións web, que suman un total de 45 prazas a razón de 15 por ciclo.
Así mesmo, renóvase tamén a colaboración con Grupo Hotusa para a impartición dos ciclos superiores de Sistemas electrotécnicos e automatizados no Cifp Politécnico de Santiago (con 20 prazas); e de Xestión de Aloxamentos turísticos (con 55 prazas repartidas nos Cifp Carlos Oroza e Compostela e no IES Vilamarín).
Ademais, tamén se seguirá ofertando o próximo ano a dobre titulación en Dirección de servizos en restauración e en Dirección de cociña, que ofertarán nos Cifp Carlos Oroza, Cifp Paseo dás Pontes e IES de Foz, que suman un total de 55 novas prazas.