A Deputación de Lugo asegura que se comprometeu a achegar unha cantidade para o desenvolvemento do Plan de Turismo Sostible da Ribeira Sacra un 50 % superior á cifra que porá a institución provincial de Ourense para desenvolver ese proxecto concedido polo Ministerio de Industria e Turismo.
A institución provincial lucense recoñécese "sensible" coa solicitude dos municipios que forman a Ribeira Sacra e por iso, asegura, comprometeuse co presidente do consorcio a achegar unha axuda económica para levar a cabo devandito plan e "aliviar desa forma a achega" que terían que realizar as entidades locais.
De feito, detalla que se comprometeu a pór 81.000 euros, "un 50 % máis de financiamento" que a outra "deputación implicada", a de Ourense, que "achegará 54.000 euros, segundo os datos facilitados polo Consorcio da Ribeira Sacra".
"Esta axuda extraordinaria da Deputación de Lugo supón un 40.5 % da achega que teñen que realizar os concellos, que asumen un investimento de 200.000 euros, sobre un total de 2 millóns" de investimento previstos neste proxecto
